د افغانستان بانک د عالي شورا غونډه ترسره شوه
د افغانستان بانک عالي شورا، چې د تصمیم نیونې تر ټولو لویه مرجع ده، څلورمه نوبتي غونډه یې د ۱۳۹۸ کال د مرغومې د میاشتې په ۱۴ مې او ۱۵ مې نیټې په اوږدو کې د افغانستان بانک د سرپرست او لومړي مرستیال ښاغلي واحدالله نوشیر په مشرۍ او د عالي شورا د نورو غړو په شتون کې ترسره شوه.
د دې غونډې په پيل کې د افغانستان اقتصادي وضعیت پرڅرنګوالي، د پولي سیاست پرتطبیق، د بانکي نظام کړنې او د هېواد د مالي نظام پر اړوند موضوعاتو بحث ترسره شو.
د یادې غونډې په پیل کې د افغانستان بانک سرپرست او لومړي مرستیال واحدالله نوشیر له اجنډا سره سم د لاسته راوړنو او ننګونو په اړه په تفصیل سره خبرې وکړې او وروسته یې د افغانستان بانک د اړوندو څانګو پروګرامونه او راپورونه واوریدل شول، چې په دې برخه کې د عالي شورا له خوا لازمې پریکړې وشوې.
