د سوداګریزو بانکونو د کارکوونکو لپاره د ښوونیز پروګرام جوړېدل
د افغانستان بانک د مالي رپوټونو او معاملو د شننې مرکز لخوا د سوداګریزو بانکونو د بانکي عملیاتو او له قوانینو څخه د پیروی برخې د کارکوونکو لپاره ښوونیز پروګرام جوړ شو.
دا ښوونیز پروګرامونه د مالي رپوټونو او معاملو د شننې مرکز د کلني پلان سره سم د پیسو وینځلوAML/CFT او نورو اړوندو مالي جرمونو سره د مبارزې په برخه کې د بانکي سکتور د ظرفیت لوړولو په موخه د روان ۱۴۰۲ لمریز کال د تلې په ۲۴ او ۳۰ مه، د لړم په ۱۶ مه او د لیندۍ په ۱۹ مه نېټه د افغانستان بانک په مرکزي دفتر کې جوړ شوي وو. په دې پروګرام کې د سوداګریزو بانکونو د اوړوندې برخې کارکوونکو ته د سوداګریزو بانکونو د پېرودونکو د مشکوکو او لویو معاملو د رپوټونو چمتو کولو په برخه کې د پیسو وینځلو او له جرمونو څخه د را پیدا شویو عوایدو د مخنیوي قانون، مقرراتو، عملیاتي برخو او یو شمېر نورو اړوندو موضوعاتو په اړه تفصیلي معلومات ورکړل شول.
باید وویل شي چې د افغانستان د مالي رپوټونو او معاملاتو د شننې مرکز په ۲۰۰۶ زیږدیز کال کې رامنځته شوی دی او اساسي موخې یې د پیسو وینځلو او نورو اړوند مالي جرمونو د ګواښونو پر وړاندې د افغانستان د مالي سیستم ساتنه، له جرمونو څخه د را پیدا شوو عوایدو ته د مجرمینو د لاسرسي مخنیوی، روڼتیا او حساب ورکولو ته وده ورکول دي.
