د بانکي او مالی سکتور د ملاتړ په موخه د هېواد په سویل ختیځ زون کې لویه غونډه جوړه شوه
۱۴۴۵ رجب المرجب ۲۴ – د افغانستان بانک په نوښت د هېواد په سویل ختیځ زون پکتیا ولایت کې غونډه جوړه شوه چې د پکتیا، پکتیکا، خوست او غزني ولایتونو محترمو ولایتي چارواکو په شمول پکې نورو حکومتي ادارو هم ګډون کړی وو او خلک یې د بانکي سکتور او د افغانستان بانک نورو سیاستونو ملاتړ ته وهڅول.
د دې غونډې په پيل کې د پکتیا د والي مرستیال ښاغلي شیخ انعام الله صلاح الدین خبرې وکړې او میلمنو او د افغانستان بانک پلاوي ته یې د ښه راغلاست ویلو ترڅنګ د افغانستان بانک د کړنو، په ځانګړې توګه د افغانۍ د نرخ د ثبات ستاینه او قدرداني وکړه او له لایزال خدای څخه یې ورته د خلکو د لازیات خدمت توفیق وغوښت.
ښاغلي صلاح الدین د خپلو خبرو په بله برخه کې د چارو په ترسره کولو کې تواضع، اطاعت او ژمنتیا د هېواد د وضعیت په ښه والي کې مهم اصل وباله او له مسئولینو څخه یې وغوښتل ترڅو خپل کاري مسئولیتونه په ښه توګه ترسره کړي.
د دې غونډې په بله برخه کې د افغانستان بانک سرپرست ښاغلي هدایت الله بدري په اغېزناکه توګه د پولي سیاستونو د پلي کولو، د افغانۍ دودولو، د بانکي سکتور ملاتړ، د صرافیو او پولي خدمتونو د وړاندې کوونکو د کړنو میکانیزه کولو، د اسلامي بانکوالۍ پراختیا او د افغانستان بانک د نورو لاسته راوړنو په اړه خبرې وکړې او د یادو سکتورونو د لا ښه والي لپاره یې د علماوو، متنفذینو، سوداګرو او خلکو رول مهم وباله او له دوی څخه یې وغوښتل څو د سیاستونو د اغېزناکه پلي کولو په برخه کې د افغانستان بانک ته د همکارۍ لاس ورکړي.
ښاغلي بدري د خپلو خبرو په اوږدو کې په افغانستان کې اسلامي بانکوالي یوه مهمه اړتیا وبلله او په بنسټیزه توګه د دې سکتور د ترویجولو په برخه کې یې د افغانستان بانک د ژمنتیا یادونه وکړه او زیاته یې کړه چې په هېواد کې د اسلامي بانکوالۍ د لا دودولو او پیاوړي کولو لپاره د خلکو همکاریو ته اړتیا ده.
د غونډې په دوام کې د بانکي سکتور د اوسني وضعیت او راتلونکي اصلاحي پروګرامونو، د اسلامي بانکوالۍ د پراختیا او مالي خدمتونو ته د خلکو د لاسرسي او د صرافیو او پولي خدمتونو د وړاندې کوونکو په تړاو ګډون کوونکو ته د ګټورو پریزنټیشنونو د وړاندې کولو ترڅنګ بحث او خبرې اترې وشوې.
په پای کې د افغانستان بانک د ریاست د دفتر لوی آمر ښاغلي صدیق الله خالد د غونډې جمع بندي وکړه او په لنډه توګه یې د افغانۍ د دودولو، د راکړو ورکړو پر مهال یې په سمه توګه کارونې، د اسلامي بانکوالۍ پراختیا، د صرافیو او پولي خدمتونو وړاندې کوونکو او د غیر بانکي مالي مؤسسو د کړنو میکانیزه کولو او بانکي سکتور څخه د ملاتړ په تړاو خبرې وکړې. ښاغلي خالد د دې پروګرامونو په بریالیتوب کې د خلکو رول مهم وباله او له هغوی څخه یې د همکارۍ غوښتنه وکړه.
