د شرعي او حقوقي څېړنې لوی آمریت
د افغانستان بانک د شرعي او حقوقي څېړنې لوی آمریت په ۱۳۸۳ هـ ل کال کې د حقوقي مشاوریت دفتر په نوم د افغانستان بانک په اډانه کې جوړ شوی دی. دا لوی آمریت د تقنیني اسنادو د تسوید په ګډون د افغانستان بانک د قوانینو او نورو تقنیني اسنادو په اړه لازمې مشورې او لارښوونې وړاندې کوي. همدارنګه، د هغو قضایاوو رهبري او تعقیب ترسره کوي چې د افغانستان بانک ګټې پکې مطرح وي.
د یادولو وړ ده، د اسلامي شریعت د احکامو او د هېواد له نورو نافذه قوانینو سره د افغانستان بانک د تقنیني اسنادو همغږي کول یا تعدیلول، د افغانستان بانک شرعي، حقوقي او تقنیني اړتیاوو ته ځواب ورکول، له دولتي ادارو، نړیوالو سازمانونو سره په غونډو کې ګډون (په هغه صورت کې چې دا غونډې د افغانستان بانک شرعي، حقوقي موضوع ګانې او مسئولیتونه راونغاړي) د دې لوی آمریت له مسئولیتونو څخه دي.
جوړښت
د شرعي او حقوقي څېړنې لوی آمریت د یو آمر او دوه (د شرعي څېړنې مرستیالیت او د حقوقي څېړنې مرستیالیت) لري چې هر یو یې د تشکیلاتي جوړښت له مخې لاندې مدیریتونه رهبري او مدیریت کوي.
• د شرعي څېړنې لوی مدیریت
د بانکي قوانینو او نورو اړوندو تقنیني اسنادو فقهي تخریج، شرعي تحقیق، شرعي کتنې او شرعي فتوای ورکولو چارې ترسره کول ترڅو وکولای شي د افغانستان بانک قوانینو او نورو تقنیني اسنادو تطابق د اسلامي شریعت له احکامو سره تر لاسه کړي.
د راجع شویو مالي او بانکي مسایلو د شرعي څېړنې، شرعي کتنې او یا د هغوی اړوند شرعي نظر ترتیبول. همدارنګه، د اړتیا په صورت کې د فقهي تخریج، شرعي څېړنې او شرعي نظر په اړه د افغانستان بانک دننه او بهر د اړوندو برخو سره په غونډو کې ګډون کول او د یادو مواردو په اړه تشریح او توضیح وړاندې کول د دې مدیریت له مسئولیتونو څخه شمېرل کیږي.
• د قوانینو او مقرراتو د تسوید لوی مدیریت
د نړیوالو معیارونو، نړیوال بانک، نورو ملي او نړیوالو ادارو له غوښتنو سره سم او همدارنګه وخت او حالاتو ته په کتلو سره د افغانستان بانک د تقنیني سندونو طرح او تعدیلول. د افغانستان بانک په اړوندو قوانینو او نورو تقنیني اسنادو کې د تعدیل، بدلون او زیاتولو په اړه د افغانستان بانک د شعبو، اړوندو دولتي، خصوصي او نړیوالو ادارو د نظرونو راټولول او د بانکوالۍ د سیستم د قوانینو او نورو تقنیني اسنادو په اړه د افغانستان بانک او عدلیې قدرمن وزارت ترمنځ د اړیکو ټینګول د دې برخې له دندو څخه شمېرل کیږي.
• د تقنیني او اداري اسنادو د مشورو ورکولو لوی مدیریت
د افغانستان بانک د عالي شورا، عامل پلاوي او اړوند آمریتونو، همدارنګه د سوداګریزو بانکونو او د پولي خدمتونو د وړاندې کوونکو او صرافانو د غوښتنې پر اساس په حقوقي موضوعاتو کې د افغانستان بانک د قوانینو او نورو تقنیني اسنادو سره سم حقوقي مشورې او نظر وړاندې کول.
همدارنګه، د هغو قضایاوو رهبري او تعقیب ترسره کول چې د افغانستان بانک ګټې پکې مطرح وي د دې برخې له دندو څخه شمېرل کیږي.
• د قراردادونو او انفرادي موضوع ګانو مشورو ورکولو لوی مدیریت
د اړوندو تقنیني اسنادو له احکامو سره سم د قراردادونو، هوکړه لیکونو او تفاهم لیکونو بیا کتنه، بررسي او حقوقي نظر وړاندې کول. همدارنګه د قدر وړ د مقام د لارښونې او یا د افغانستان بانک د اړوندو آمریتونو د غوښتنې پر اساس د هوکړه لیکونو او تفاهم لیکونو تسوید او ترتیبول د دې برخې له مسئولیتونو څخه دي.
• د عالي شورا د جلسو همغږي کوونکی
د قدر وړ د مقام د لارښوونې پر بنسټ د عالي شورا د غونډو د نېټې ټاکل، د عالي شورا د غړو سره د غونډو د نېټې شریکول، د عالي شورا په اجنډا کې د موضوعګانو د نیولو لپاره ټولو آمریتونو ته متحدالمال لیږل، همدارنګه د قدر وړ مقام د هوکړې پر بنسټ د عالي شورا اجنډا جوړونه او د هغه شریکول د عالی شورا له غړو سره، په تصاویبو کې د عالي شورا د غړو لاسلیکونو اخیستنه، اړوند آمریتونو ته د عالي شورا د تصاویبو لیږل او داسې نور موارد د دې برخې له دندو څخه دي.
• عمومي اجرائیه
ټول اسناد چې د افغانستان بانک له اړوندو آمریتونو او بهرني ادارو څخه شرعي او حقوقي څېړنې لوی آمریت ته استول کیږي، د واردې په کتاب کې ثبتول او د آمر له لارښوونې څخه وروسته، د سند اسکن کول، د رسمي برېښنالیک پر بنسټ د سند لیږل اړوند برخې ته. همدارنګه، هغه اسناد چې د شرعي او حقوقي څېړنې لوی آمریت څخه نورو اړوندو آمریتونو ته لیږل کیږی د مکتوبونو ثبتول د صادرې په کتاب کې، د هغه مینوټ د رسمي برېښنالیک پر اساس اړوند برخې ته لیږل او برېښنایي اسنادو آرشیف ته د ټولو پورته یاد شویو اسنادو پورته کول.