د اسعارو د لیلام د څرنګوالي په اړه د صرافانو لپاره ښوونیزه غونډه
کابل، ۱۳۹۸ کال د سلواغې ۶ مه – د افغانستان بانک د کنفرانسونو په تالار کې د کابل ښار ۷۰ تنه صرافانو ته چې د اسعارو د لیلام په پروسه کې ګډون کوي، د معاملو د ترسره کولو په وخت کې د قانون او مقررو په رڼا کې د لازمو اسنادو اخیستلو او همدا شان د معاملو د څارنې په اړه ښوونیزه غونډه جوړه شوه.
په دې غونډه کې له غیربانکي مؤسسو څخه د څارنې د لوی آمریت مرستیال ښاغلي سید محسن سادات د اړوندې موضوع په اړه له صرافانو سره معلومات شریک کړل.
نوموړي یادونه وکړه چې پر صرافیو او نورو مالي ادارو باندې د افغانستان بانک د څارنې موخه د روڼتیا رامنځته کول او په دې برخه کې د خطرونو را کمول دي.
ورپسې له غیربانکي مؤسسو څخه د څارنې د لوی آمریت له پولي خدمتونو او صرافیو څخه د څارنې مدیر ښاغلي شاپور میاخېل د دې آمریت له لوري د څارنې پر څرنګوالي، د اسعارو د لیلام او په دې برخه کې د آسانتیاوو د رامنځته کولو په اړه صرافانو ته معلوماتي پریزنټیشن وړاندې کړ.
باید وویل شي چې په یاده غونډه کې ګډونوالو صرافانو هم په دې اړه خپلې پوښتنې، وړانديزونه او نظرونه د دې آمریت له کارکوونکو سره شریک کړل او د دوی پوښتنو ته ځوابونه وویل شول.
