دسهیلي آسیا (سارک) هیوادونو د سیمه ایزو همکاریو د شبکې غونډه
۱۳۹۹ د کب ۱۱ – د سهیلي آسیا (سارک) هیوادونو د سیمه ایزو همکاریو د شبکې یو څلوېښتمه غونډه په آنلاین ډول د افغانستان بانک د مشرتابه په ګډون تر سره شوه.
پدې غونډه کې لومړی ښاغلي شاکتیکانتا داس د هندوستان د مرکزي بانک رئيس چې په عین وخت کې یې د سارک فایننس د غونډې مشري هم تر سره کوله، د سارک د غړو هېوادونو د اوسني وضعیت، د سیمې د لوی اقتصاد، د دې سازمان د لار په نقشه کې د پرمختګونو او یو لړ اړوندو موضوعاتو په اړه خبرې وکړې.
ورپسې د افغانستان بانک د لوی ریاست سرپرست ښاغلي اجمل احمدي د افغانستان د اقتصادي وضعیت، د هېواد د ناخالصو داخلي تولیداتو، د افغانستان د ارزي زیرمو، پوراینو او یو لړ نورو اړوندو موضوعاتو په اړه خبرې وکړې، د نړۍ په ټولو هېوادونو د کرونا ویروس د ناوړه اغیزو د یادونې تر څنګ یې دا زیاته کړه چې دې پدیدې د افغانستان پر اقتصاد او پرته له شکه د سارک د غړو هېوادونو به اقصاد هم خپلې اغیزې پریښي دي.
د یادولو وړ ده چې دا شبکه په ۱۹۹۸ زیږدیز کال کې د سارک سازمان د غړیتوب لرونکو هېوادونو هر یو هندوستان، پاکستان، بنګلادیش، سریلانکا، نیپال، مالدیف او بوتان لخوا جوړه شوې ده. د دې شبکې په څوارلسمه غونډه یا ۲۰۰۷ زیږدیز کال کې افغانستان هم د سارک سازمان د اتم غړي هیواد په توګه ومنل شو.
د دې شبکې د جوړولو موخه دا ده چې د سیمې د لوی اقتصاد، د سارک شبکې د مناظرو، ګډو تحقیقاتي څیړنو، د مالي پرمختګ د همکاریو، د بانکي چارو د تنظیم او څارنې د ګډو همکاریو او ظرفیت جوړونې او همدارنګه د نویو کړنلارو او وړاندیزونو په اړه بحثونه تر سره شي.
