د افغانستان بانک د شرعي نظارت بورډ غونډه جوړه شوه
۱۴۰۰ د سلواغې ۳۰ مه – د افغانستان بانک د لومړي مرستیال ښاغلي نور احمد آغا پر مشرۍ د شرعي نظارت بورډ غونډه جوړه او د اسلامي بانکوالۍ پر بېلابېلو موضوعګانو خبرې وشوې.
په یاده غونډه کې د افغانستان بانک لومړي مرستیال ښاغلي نور احمد آغا یادونه وکړه چې د افغانستان اسلامي امارت په هېواد کې د اسلامي بانکوالۍ د ودې او پراختیا لپاره ژمن دی او په دې اړوند به د شرعي نظارت بورډ سره له هېڅ ډول هلو ځلو درېغ و نه کړي.
نوموړي همدارنګه یادونه وکړه چې دا مهال په هیواد کې د اسلامي بانکوالۍ د پراختیا لپاره د تکافل پر رامنځته کولو کار روان دی چې پر بشپړېدو سره به یې په هیواد کې اسلامي بانکوالي د پخوا په پرتله ډېره پراختیا پیدا کړي او خلک به په ډاډ سره په هغه کې پانګونې تر سره کړي.
باید وویل شي چې په دې غونډه کې د شریعه بورډ د غړو له لوري د یو شمېر سوداګریزو بانکونو د مضاربت پر پالیسۍ او د اسلامي بانکوالۍ پر یو شمېر نورو اړوندو برخو کتنه او بحث تر سره شو.
