د سوداګریزو بانکونو له استازو سره د غونډې جوړېدل
۱۴۴۴ محرم الحرام ۲۹ مه – د افغانستان بانک د لومړي مرستیال ښاغلي نوراحمد آغا پر مشرۍ د سوداګریزو بانکونو له استازو سره غونډه جوړه شوه او د پیسو لېږد (TT)، بیمې، بانکي تضمینونو او یو شمېر نورو مالي او بانکي موضوعګانو په اړه پکې خبرې وشوې.
په یاده غونډه کې د افغانستان بانک لومړي مرستیال ښاغلي نوراحمد آغا د سوداګریزو بانکونو له استازو وغوښتل چې د پېرودونکو لپاره د بانکي خدمتونو د وړاندې کولو په برخه کې اړینې آسانتیاوې رامنځته کړي.
نوموړي د افغانستان بانک له اړخه درنو هیوادوالو ته د غوره بانکي خدمتونو د وړاندې کولو په موخه له بانکونو سره د اصولو او مقرراتو په رڼا کې د هر ډول همکارۍ ژمنه وکړه.
په یاده غونډه کې د افغانستان د بانکونو د ټولنې او د سوداګریزو بانکونو استازو د ذکر شویو موضوعګانو په اړه خبرې وکړې او له خپله اړخه یې د غوره بانکي خدمتونو د وړاندې کولو ژمنه وکړه.
