د بانکي سکتور ټیکاو او ټینګښت د افغانستان بانک له کاري لومړیتوبونو څخه
د افغانستان بانک د هېواد د مرکزي بانک په توګه د بانکي سکتور د لا ټینګښت لپاره ژمن دی او د دې نظام بیا رغونې، ټیکاو او پیاوړتیا ته لومړیتوب ورکوي. یادو موخو ته د رسېدو لپاره دا ځل د افغانستان بانک په خوست، پکتیا او تخار ولایتونو کې د دې ولایتونو له چارواکو، سوداګریزو بانکونو له استازو، اصنافو، سوداګرو او قومي مشرانو سره د بانکي نظام د پیاوړتیا او پر دې نظام د باور جوړونې په موخه جلا جلا غونډې جوړې کړې.
په دې غونډو کې په اقتصادي رغښت کې د بانکونو په ارزښت او له مالي او بانکي نظام سره د خلکو په همکارۍ هر اړخیز بحثونه تر سره شول او د غونډې ګډونوالو له دې سکتور سره د خپلې همکارۍ او ملاتړ ژمنه وکړه.
د یادونې وړ ده چې د مالي او بانکي سیستم پیاوړتیا او ثبات د افغانستان بانک له ملي او نړیوالو شریکانو سره د ژمنو یوه برخه ده چې پدې برخه کې زمونږ هلې ځلې دوام لري او دا لړۍ به د هېواد نورو ولایتونو ته هم و غځېږي.
