د افغانستان بانک په پلازمینه کابل کې افغانۍ زاړه بانکنوټونه وسوځول
د ۱۳۹۸ کال د وری ۱۴ مه - د افغانستان بانک د قانون د ۳۹ او ۴۲ مادې پربنسټ یو میلیاردو ۷۸۵ میلیونه ۷ سوه زره له کاره لوېدلې زړې افغانۍ بانکنوټونه د سوځولو د ځانګړي پلاوي پر وړاندې په کابل کې وسوځول.
د افغانستان بانک دویم مرستیال ښاغلي محمد قسیم رحیمي د پیسو د سوځولو پرمهال وویل چې په افغانستان کې له پیسو څخه د سمې ساتنې کلتور باید دود شي، پیسې باید په بکسي جیبونو کې وساتل شي او بانکدارۍ سیستم باید پیاوړی شي چې نغدي معاملو حجم کم شي، څو د پیسو له ژر زړیدو او له کاره لویدو څخه مخنیوی ترسره شي.
ښاغلي رحیمي زیاته کړه که څه هم افغانۍ بانکنوټونه په لوړ کیفیت چاپ شوي، خو په ورځنیو چارو کې له دې پیسو څخه د خلکو د ناسمې ساتنې او ناوړه کارولو له امله ژر زړیږي او د بیاځلي چاپ لپاره یې لګښت ترسره کېږي.
د یادونې وړ ده چې زړو سوځول شويو بانکنوټونو زریز، پینځه سویز، سلیز، پنځوسیز، شلیز، لسیز، پېنځه ایز، دوه ایز او یو ایز ډولونه لرل چې د مشرانو جرګې، د عدلیې وزارت، مالیي وزارت او امنیتي ارګانونو د استازو په ګډون او د افغانستان بانک د بېلا بېلو برخو د پلاوي پر وړاندې وسوځول شول.
