د افغانستان بانک د بېلابېلو آمریتونو له آمرینو سره معلوماتي غونډه
کابل، د ۱۳۹۸ کال د لیندۍ ۳۰ مه – د افغانستان بانک د سرپرست او لومړي مرستیال ښاغلي واحدالله نوشېر په مشرۍ د دې بانک د بېلابېلو آمریتونو له آمرینو سره د پیسو د نړیوال صندوق (IMF) د درې کلن پروګرام د بریالیتوب په اړه معلوماتي غونډه جوړه شوه.
د افغانستان بانک سرپرست او لومړي مرستیال ښاغلي واحدالله نوشېر دا بریالیتوب د افغانستان بانک لپاره یوه لویه لاسته راوړنه یاده کړه او د دې لاسته راوړنې مبارکي یې د دې بانک ټولو آمریتونو ته وړاندې کړه.
ورپسې د افغانستان بانک دویم مرستیال ښاغلي محمد قسیم رحیمي د پیسو د نړیوال صندوق د دې پروګرام په اړه خبرې وکړې، نوموړي ددې پروګرام بریالیتوب د افغانستان بانک د ټولو کارکوونکو لاسته راوړنه او ګډه موخه یاده کړه او په دې برخه کې یې د دوی له همکارۍ مننه وکړه.
باید وویل شي چې په دې غونډه کې د افغانستان بانک د اړوندو آمریتونو آمرینو د پیسو د نړیوال صندوق د یاد درې کلن پروګرام په اړه د غونډې ګډونوالو ته معلومات ورکړل او په دې اړه یې هر اړخیزې خبرې وکړې.
دا باید زیاته شي چې په دې اړه به لا زیات معلومات د د روانې اونۍ د یکشنبې په ورځ د یو مطبوعاتي کنفرانس له لارې د رسنیو سره شریک کړل شي.
