د افغانستان بانک مطبوعاتي اعلاميه!
لکه څرنګه چې په جریان کې یاست له تېرې ورځې را په دې خوا په ټولنیزو رسنیو کې یو مکتوب چې ظاهراً د استخباراتو د ۰۴۱ رياست لخوا صادر شوی لاس په لاس کېږي، چې ګواکي صرافان او د پولي خدمتونو وړاندې کوونکي نه شي کولای چې په بهرنیو اسعارو مبادلې او لېږد تر سره کړي. دا مکتوب د افغانستان بانک سره له همغږۍ پرته خپور شوی دی.
د یادونې وړ ده چې دا ډول موضوعات د افغانستان بانک پورې تړاو لري او هره پرېکړه او تصمیم نیونه چې د مالي او بانکي سکټور، د اسعاري مبادلاتو د څرنګوالي په اړه نیول کېږي، د افغانستان بانک له اړخه د قوانینو او مقرراتو په رڼا کې تر سره کېږي.
باید وویل شي چې د افغانستان بانک د افغانۍ د ارزښت د لوړولو او په معاملاتو کې د بهرنیو اسعارو د مخنیوي لپاره تل هلې ځلې کړې دي او ژمن دی چې دې لړۍ ته به د شرایطو او ملي ګټو په پام کې نیولو سره دوام ورکړي.
د افغانستان بانک له همدې کبله د صرافانو او پولي خدمتونو د وړاندې کوونکو او د هېواد له شریفو خلکو غواړي چې خپلې پولي معاملې د افغانستان بانک د قوانینو او مقرراتو په رڼا کې تر سره کړي.
