د سوداګریزو بانکونو سره د همغږۍ غونډه
۱۴۰۰ د وږي ۱۵مه - د افغانستان بانک د سرپرست رئیس ښاغلي ملا عبدالقاهر په مشرۍ د سوداګریزو بانکونو له استازو سره د همغږۍ غونډه جوړه شوه.
په دې غونډه کې د پیسو د کورني او نړیوال لېږد را لېږدپه اړه هر اړخیزې خبرې وشوې او د نظرونو تبادله تر سره شوه.
د افغانستان بانک مشرتابه پلاوي د سوداګریزو بانکونو استازو ته په دې اړه لازمې لارښوونې وکړې او له دوی یې وغوښتل چې د بانکي خدمتونو په برخه کې د خلکو لپاره لا زیاتې آسانتیاوې رامنځته کړي.
د افغانستان بانک دویم مرستیال ښاغلي عبدالقدیر احمد د غونډې په وروستۍ برخه کې یادونه وکړه چې د ا.ا.ا د مالي او بانکي سکتور پر مختګ ته ژمن دی او هڅه کوي چې د سوداګریزو بانکونو ټولو ستونزو ته پر وخت رسېدنه وشي.
د یادونې وړ ده چې په دې غونډه کې د افغانستان بانک د رهبري پلاوي او یو شمېر کارکوونکو سربېره د بانکونو د ټولنې مسئولینو، د نوي کابل بانک، افغان ملي بانک، غضنفر بانک، پښتني بانک، د افغانستان نړیوال بانک، عزیزي بانک، میوند بانک، افغان یونایټډ بانک، د افغانستان اسلامي بانک، الفلاح بانک، د کوچنیو پورونو لومړني بانک او د پاکستان نشنل بانک استازو ګډون کړی وو.