د افغانستان بانک نړیوالو اصولو پربنسټ پرمختیایي اصلاحاتو ته ژمن دی
د افغانستان بانک د چارو د ښه پرمختګ او روڼتیا رامنځته کولو لپاره د حاضرۍ الکترونیک (برېښنائي) سیستم په یو شمېر ولایتي نمایندګیو کې فعال کړی او ټولو نمایندګیو ته د دې سیستم د غځېدو لړۍ دوام لري.
د بشري سرچینو لوی آمریت اړوند د کارکوونکو د معلوماتو او سمبالښت مدیریت لخوا برېښنائي حاضري د مرکز سیمه یېز زون څخه پیل شوې چې تر اوسه د کاپیسا، پروان، پنجشیر او لوګر ولایتونو کې نصب شويدي او تر راتلونکو دوه اونیو پورې به د مرکزي زون اړونده څانګو کې بشپړ او په دوهم پړاو کې به د افغانستان بانک د شپږو زونونو اړوند نمایندګیو کې برېښنائی ډیوایسونه نصب شي.
باید وویل شي چې د برېښنائي حاضرۍ نصب کولای شي د مالي برخې له همکارانو سره مرسته وکړي چې پر وخت سره د حاضرۍ راپور تر لاسه کړي او د کارکوونکو د معاشونو په اجرا کې ځنډ رامنځته نه شي.
همدارنګه د دې پروسې ګټه دا ده چې کار کوونکي پر خپل وخت دندې ته حاضريږي او پر خپل وخت له خپلې دندې رخصتیږي. پدې سره د خپلسریو، له رسمي وخت څخه ناوړه ګټه اخیستنې او ناوخته دندې ته راتګ او د وختي تګ مخنیوی کېږي او درنو هیوادوالو ته پر وخت د غوره خدمتونو د وړاندې کولو زمینه برابروي.