د افغانستان بانک د ټولو رییس د مالي او بانکي سکتور د وضعیت د لیدلو او ارزولو لپاره غور ولایت ته سفر وکړ
۱۴۴۶ د صفر المظفر ۲۹ - د افغانستان بانک د ټولو رییس ښاغلي نور احمد آغا د افغانستان بانک د نمایندګیو د لیدنو په لړ کې دا ځل د غور ولایت ته سفر وکړ او د دې څانګې له مسئولینو سره یې ولیدل. د دې لیدنو موخه د مالي او بانکي چارو ښه والی، خلکو ته د معیاري خدمتونو وړاندې کول او د هېواد په لېرې پرتو سیمو کې مالي خدمتونو د پراختیا لپاره هڅې په ګوته شوي دي.
د افغانستان بانک د ټولو رییس د غور څانګې کارکوونکو ته په خپلو خبرو کې وویل چې تاسې حساسې او ارزښت لرونکي دندې لرئ او د اوسنیو شرایط په پام کې نیولو سره زموږ دنده ده، ترڅو خپل ملت او خلکو ته خدمت وکړو او اسانه او کیفیت لرونکي خدمتونو ته د هغوی لاسرسۍ ته زمینه برابره کړو.
ښاغلي نور احمد آغا د دې رسمي سفر په بله برخه کې د غور ولایت د سوداګریزو بانکونو له چارواکو سره هم ولیدل او پر یو شمېر موضوعاتو د بحث ترڅنګ یې د هغوی د کړنو څرنګوالي وارزاوه. هغه په غور ولایت کې د بانکونو د کړنو د کمزورتیاوو او پیاوړتیاوو په یادولو سره وویل چې د افغانستان بانک په ټول هېواد کې د مالي او بانکي خدمتونو پراختیا ته ژمن دی او په دې برخه کې به نه ستړې کېدونکې هلې ځلې کوي.
د افغانستان بانک د دې رسمي سفر په اوږدو کې د صرافانو او پولي خدمتونو د وړاندې کوونکو له استازو سره هم د یوې لنډې ناستې په اوږدو کې ولیدل او د صرافانو د کړنو په تنظیمولو او د مالي جریان په قانوني کولو کې یې د هغوی رول مهم وباله. هغه له صرافانو وغوښتل، ترڅو خپل رول د اړوند نافذه قانون په رڼا کې په ښه ډول ترسره کړي او له د افغانستان بانک سره د غیر بانکي مالي سکتور د ښه کېدو په برخه کې همکار پاتې شي.
