د افغانستان بانک خبرتیا
په دې وروستیو کې یو شمیر مغرضو اشخاصو د ټولنیزو شبکو په ځینو پاڼو، په ځانګړې توګه ټلګرام کې پر غولوونکو فعالیتونو لاس پورې کړی دی، او د ټولنیزو شبکو د کاروونکو د جلبولو په موخه په ځانګړو ګروپونو کې د برخې اخیستلو بلنې شریکوي، او په پای کې ستاسې پیسې غلا کوي.
د افغانستان بانک د آنلاین صرافیو او اپلیکیشنونو د کارونې د هر ډول فعالیت د منع کیدو د مخکنیو خبرتیاوو په تعقیب چې تاسې ته ستاسو د پیسو په بدل کې د زیاتې ګټې وعده درکوي، یو ځل بیا خپلو ګرانو هیوادوالو ته خبر ورکوي چې د دې ډول غولوونکو اپلیکیشنونو او آنلاین صرافیو فعالیت منع او غیر قانوني دی.
دا چې د افغانستان بانک د دې ډول فعالیتونو هیڅ جواز نه دی صادر کړی، نو په همدې بنسټ د ګرانو هیوادوالو څخه غوښتنه کوي چې د دې ډول فعالیتونو د خطرونو، خسارو او مسوولیتونو په پام کې نیولو سره، د دې ډول مغرضو اشخاصو په خبرو ونه غولیږي، او د دې ډول اشخاصو او د ټولنیزو شبکو د ګروپونو د لیدلو په صورت کې د هغوی پته عدلي او قضایي ارګانونو ته معرفي کړي.
په ورته وخت کې موضوع د کشفي او امنیتي ادارو سره هم شریکه شوې ده. د حقیقي او حقوقي اشخاصو، چې په دې ډول غولوونکو فعالیتونو لاس پورې کوي، د نیولو په صورت کې به ورسره قانوني چلند ترسره شي.
