د صرافانو او پولي خدمتونو وړاندې کوونکو د فعالیتونو د همغږۍ او میکانیزه کولو په پار غونډه جوړه شوه
د ۱۴۴۴کال د ذوالقعدة الحرام ۷ مه – د افغانستان بانک د سرپرست رئیس ښاغلي هدایت الله بدري په مشرۍ د صرافانو او مالي خدمتونو وړاندې کوونکو له استازو سره د هغوی د فعالیتونو د میکانیزه کولو او د اسانتیاوو رامنځته کولو په اړه غونډه جوړه شوه.
د افغانستان بانک سرپرست رئیس ښاغلي هدایت الله بدري د صرافانو او د مالي خدمتونو وړاندې کوونکو له استازو سره د افغانستان بانک د قانون او مقرراتو په چوکاټ کې د هر ډول همکارۍ ژمنه وکړه او زیاته یې کړه چې د افغانستان بانک ژمن دی ترڅو د صرافانو او مالي خدمتونو وړاندې کوونکو د فعالیتونو د مؤثریت او ښه والي لپاره د اسانتیاوو رامنځته کولو په برخه کې له هیڅ ډول هڅو دریغ و نکړي. همدارنګه ښاغلي بدري د صرافانو او د مالي خدمتونو وړاندې کوونکو له استازو څخه وغوښتل چې خپلې ټولې کړنې د افغانستان بانک د قوانینو او مقرراتو په رڼا کې ترسره کړي.
همدا راز، د افغانستان بانک لومړي مرستیال ښاغلي نور احمد آغا په دې غونډه کې د صرافانو ستونزو او غوښتنو ته مناسب ځوابونه وویل او ژمنه یې ورسره وکړه چې د هغوی ستونزو ته به د بانک د اړوندو آمریتونو د اصولو او مقرراتو په رڼا کې مناسبې حل لارې وموندل شي. د دې ترڅنګ، ښاغلي نور احمد آغا د خپلو خبرو په ترڅ کې وویل چې له هېواد څخه د اسعارو قاچاق زمونږ اقتصاد ته زیان رسوي او د مخنیوي لپاره یې باید ټول په ګډه هڅې وکړو.
د صرافانو او مالي خدمتونو وړاندې کوونکو استازو ژمنه وکړه چې خپل ټول فعالیتونه به د افغانستان بانک د قوانینو او مقرراتو په رڼا کې ترسره او د خلکو لپاره به اړینې اسانتیاوې رامنځته کړي.
د یادونې وړ ده چې په دې غونډه کې د افغانستان بانک د اقتصادي پالیسۍ ارشد سلاکار ښاغلي لطف الحق نور پسرلي، د غیر بانکي مالي مؤسسو د څارنې لوی آمر ښاغلي احمد ظاهر ناصرزي او د بانکي څارنې د آمریت معاون احسان الله منصور هم ګډون کړی وو.