په کابل کې د افغانۍ مندرس بانکنوټونه وسوځول شول
۱۴۴۶ د محرم الحرام ۳ مه – د افغانستان بانک د قانون د ۳۹ او ۴۲ مادې پر بنسټ (۸۸۹،۹۲۰،۰۰۰) اته سوه او نهه اتیا میلیونه، نهه سوه او شل زره افغانیو په ارزښت مندرس بانکنوټونه چې د افغانۍ ټولې انواعیې په کې شاملې وې د ټاکل شوي پلاوي په شتون کې تر کره شمېرنې وروسته و سوځول شول.
د افغانستان بانک دویم مرستیال ښاغلي ملا محمد آخوند چې په همدې تړاو یې د مندرسو بانکنوټونو د سوځونې په دې پروسه کې خبرې کولې له خلکو وغوښتل چې د سوداګریزو او اقتصادي راکړو او ورکړو پر مهال د بانکنوټونو ساتنې ته پاملرنه وکړي، تر څو له دې لارې د بانکنوټونو له ژر زړېدو څخه مخنیوی وشي.
د یادونې وړ ده، چې راټول شوي له کاره لویدلي بانکنوټونه د عدلیې او مالیې وزارتونو، اړوندو ادارو او د افغانستان بانک د بېلابېلو آمریتونو د استازو په شتون کې د ګمارل شوي پلاوي له خوا تر بارولو وروسته ځانګړو کرو ته انتقال او وسوځول شول.
